पन्द्रह अगस्त के परब ला संगी, चलो जुरमिल सबो मनाबो गा।
तीन रंग के हे झंडा हमर,चलो तिरंगा ला फहराबो गा।।
बैपार करे बर आईन अंग्रेज, पहिली हाथ मा धरके झोरा।
लूट-लूट के पाछू तहाँ ले,ओ मन भर लेगिन बोरा-बोरा।।
मउका अइसन अउ झिन आवय, तेखर सुरता ला हमन गाबो गा।
तीन रंग के हे झंडा हमर, चलो तिरंगा ला फहराबो गा।।
देश ला आजाद कराये बर पुरखा, कतको गोली खाइन छाती मा।
नव जवान अउ लइका सियान, कतको हाँसत झुलगे फाँसी मा।।
देश बर शहीद वीर सपूत के, सुरता ला सब गोहराबो गा।
तीन रंग के हे झंडा हमर, चलो तिरंगा ला फहराबो गा।।
असहयोग अउ भारत छोड़ो, जब आंदोलन चलिस स्वदेशी।
तब आखिर मा राज छोड़ के, भागिन हे ओ परदेशी।।
आज एकता के पाठ ला भइया, चलो सबो ला पढ़ाबो गा।
तीन रंग के हे झंडा हमर, चलो तिरंगा ला फहराबो गा।।
अब राजा मन के राज छूटगे, चलदिन हे मालगुजारी जी।
हाथ हलावत अंग्रेज हा रहगिन, बिन लोटा बिन थारी जी।।
परजातंत्र के मन्तर ला संगी, चारो डाहर बगराबो गा।
तीन रंग के हे झंडा हमर, चलो तिरंगा ला फहराबो गा।।
रचना- गुमान प्रसाद साहू, समोदा (महानदी)
थाना- आरंग, जिला- रायपुर ,छत्तीसगढ़
मोबा.- 9977213968,9977313968
दिनांक- 03-06-2007
No comments:
Post a Comment