नेता मन ला अइसे रंग दव, आवय झन पहिचान मा गा।
सबो गड़बड़ी इकरे ले हे, हमर हिन्दुस्तान मा गा।।
ये मन वोट के राजनीति मा, हम ला करथें रोज हलाल।
इँखर बाहिर ले भीतर तक, भर दव सँगी रंग गुलाल।।
इँखर नाक कान कटवा दव, भीड़ भरे मैदान मा गा।
सबो गड़बड़ी इकरे ले हे, हमर हिन्दुस्तान मा गा।।
मंदिर मस्जिद के झगड़ा अउ, खून के नदिया देश मा।
इँखरे सब करनी हरय जी, अलग-अलग धरे भेष मा।।
ये वोट के भिखारी नेता, उरत फिरथे आसमान मा गा।
सबो गड़बड़ी इकरे ले हे, हमर हिन्दुस्तान मा गा।।
येमन बापु के भुइयाँ मा, दारू के नदिया बहाथें।
रोज खेलथे होली अउ संगी, हर रात देवारी मनाथे।
अतका अत्याचार करत हे, नेता रूपी शैतान मन गा।
सबो गड़बड़ी इकरे ले हे, हमर हिन्दुस्तान मा गा। ।
रचना- गुमान प्रसाद साहू, समोदा (महानदी)
थाना- आरंग, जिला- रायपुर ,छत्तीसगढ़
मोबा.- 9977213968,9977313968
दिनांक- 25-08-2006
Gpsahu2.blogspot.com
No comments:
Post a Comment