" बापू तोला परणाम हे "

"बापू तोला प्रणाम हे"

राष्ट्रपिता ओ प्यारे बापू, शत् शत् तोला प्रणाम हे।
जुग जुग ले नइ भूलावन, अमर रहही तोर नाम हे।

जेन हमन नवा जीवन पाये हन, बापू तंही हर देवाये हस।
अहिंसा के नाद छोड़ के, सजग ग सबला बनाये हस।
दुनिया कभू भूला नइ पावय, अइसन ग तोर काम हे।
राष्ट्रपिता ओ प्यारे बापू, शत् शत् तोला परणाम हे।

असहयोग,भारत छोड़ो, अंदोलन ल तै चलाये ग।
अंगरेज मनके शासन ले, देश ल अजाद कराये ग।
अमन शांति ले अजादी चाहेस,
करे कभू न तै संंग्राम हे ।
राष्ट्रपिता ओ प्यारे बापू, शत् शत् तोला प्रणाम हे।

छुआछूत अउ जातपात ल, देश ले तंही मेटाये हस।
अपन काम ल अपन करव, सबला तंही सिखाये हस।
खादी कपड़ा तै हरदम पहिरे, विदेशी रिहिस हराम हे।
राष्ट्रपिता ओ प्यारे बापू, शत् शत् तोला प्रणाम हे।।

खुद तै पीड़ा ल सहि के, देश के दरद ल मेटाये ग।
गोरे शासन म घलो तै हर, देशी क्रान्ति ल लाये ग।
मूँह म तोरे बसे रहिस हे, हरदम राम के नाम हे।
राष्ट्रपिता ओ प्यारे बापू, शत् शत् तोला प्रणाम हे।।

:- गुमान प्रसाद साहू
ग्राम-समोदा (महानदी)
मो. :- 9977313968
जिला-रायपुर छग

Gpsahu2.blogspot.com